【遊記‧南韓】首爾住宿篇(上)

第一晚抵達酒店房已接近十一點,冇影相。到第二朝起身稍為整理床鋪先影,因此床邊皺皺的波浪乃是血肉之軀壓成的。

第一晚抵達酒店房已接近十一點,冇影相。到第二朝起身稍為整理床鋪先影,因此床邊皺皺的波浪乃是血肉之軀壓成的。

話左唔寫之終於又要寫。

博主Ms Nobody前晚又再追問我關於首爾住宿篇下落,為咗要避這份稿,我覺得還是用「佔中」做擋箭牌最好:「嗱,唔關我事㗎,而家佔中ing,人人都要睇雨傘革命,斷估冇心情click入呢啲風花雪月版位啩。」

但話咗唔寫又終歸要寫,好似返工咁,明明我公司附近之地面交通命脈盡斷,但我都要如常歸巢,辛勞作日。

好了,講返首爾篇,作為commatravel一份子,竟然對寫遊記沒甚麼興趣,原因是要影相,又要記資料,好麻煩。受Ms Nobody所托(這女人就如我波士,還是冇出糧果隻),因利乘便到首爾出差公幹,自然要有所貢獻,即是實行捐款制咁,多少無拘,但唔能夠話冇囉。

OK!為了敷衍……唔係,係為了貢獻,我揸了些少腦汁出來。

是次行程,只寫住宿,無其他推介。就先寫頭兩晚入住的JW Marriott Dongdaemun Square Seoul,屬東大門少有的型格五星級酒店,話說「型格」並不出自我口中,只是引用媒體的話,到底是否型格,我個人認為是見人見智,在我眼裏,只是五星級大酒店的格局,多一分都冇。但地理位置確實一「啜」(又可理解為絕),首先以每晚約2,500蚊港紙的價位住在東大門中心,去血拼購物當然爽到無人有啦,事關Doota就在對面,真的方便過去街口間便利店。但吊詭之處是東大門區出名價廉,嚟得該區者當然是主打掃平貨,住宿錢若慳返去濕平,豈不是更合理?我畀得商務價(住宿費不是我畀)又點會吼住平民貨呢?

好吧!我唯有當這間酒店是東大門的景點,反正我就是鄉民劉姥姥,出來觀城的。到酒店第一晚即與同行熟人去doota逛一圈,哇!求其拿起一件白恤衫都要過千,又話東大門的衫又平又靚,仲可以講價?我眼見那些售貨員妹妹的面口燶過粟一燒,點講價呢?一千蚊講到九百九十九?傻的嗎?

後來從其他高級情報得知,要到批發市場買先平,最好夾埋幾位朋友去,大家睇中同一件,齊齊買。

講返正題,雖然話這間酒店很standard,但住宿經驗還是相當愉快的,首先是酒店員工的服務態度一百分,而且英語水準高,絕對溝通到有餘;其次是房間舒適寛敞,比較之後那晚的偽精品酒店,我會說是超水準,且鋪木地板,感覺乾淨利落得多。房間又備有Nespresso咖啡機及capsules。不見得特別型格,但簡約利落,令人覺得舒心,美中不足是被編到尾房了,景觀對住疑似員工休息區及停車場,要長期拉紗廉,免被望見。

而我還很好地善用了如此舒適的房間,邀請好友上房傾計,聊至黃昏才起身去清溪川散步。

床對住plasma,但沒有開過電視。

床對住plasma,但沒有開過電視。

書檯啱啱好夠放喬裝用的道具。

書檯啱啱好夠放喬裝用的道具。

備有Nespresso咖啡機,抽屜裏有capsules,但冇奶,冇奶囉。最後轉了飲茶。

備有Nespresso咖啡機,抽屜裏有capsules,但冇奶,冇奶囉。最後轉了飲茶。

落地窗前的單人座,對住一班正在休息吹水的員工……

落地窗前的單人座,對住一班正在休息吹水的員工……

房間另一邊是衣帽間及浴室。

房間另一邊是衣帽間及浴室。

兩邊都是衣櫃,特別是中間有一排櫃筒。

兩邊都是衣櫃,特別是中間有一排櫃筒。

標準的酒店式洗手枱。

標準的酒店式洗手枱。

浴室左手邊是沐浴花灑。

浴室左手邊是沐浴花灑。

右手邊就是浴缸了,設計同樣簡單冇花巧。

右手邊就是浴缸了,設計同樣簡單冇花巧。

知微見著,用得L'Occitane的洗頭水沐浴露,顯露五星級風範。

知微見著,用得L’Occitane的洗頭水沐浴露,顯露五星級風範。

後話:幾年前去韓國住更高檔的Park Hyatt,當時在洗手間內搵唔到牙膏牙擦;兩年前再到首爾住平民級的PJ Hotel,也是沒有牙具;到今次這間東大門JW Marriott,都係冇!即是無牙擦與酒度粒星無關。解決方法,撥通服務台要求服務員送上來吧!若然支持環保,不妨自備啦。

JW Marriott Dongdaemun Square Seoul
地址:279, Cheonggyecheon-ro,Jongno-gu Seoul 110-126 South Korea
查詢電話:+82 (0) 2 2276 3000
前往方法:地鐵 1 號線東大門站2號出口,三十步之內見到酒店入口。
網址:http://www.marriott.com/hotels/hotel-information/travel/seldp-jw-marriott-dongdaemun-square-seoul/

發表迴響

你的電子郵件位址並不會被公開。

文字無價 知己難求!

如果您喜歡CommaTravel的文章,只要按個讚支持,謝謝 🙂