【文化‧香港】港式腦細的世界級思維

雖然Commatravel是講旅遊的,但隨住我倆的職場生活愈來愈緊湊,唔知幾時再有時間/機會/錢錢去玩,我決定用旅行這個如此正面兼有意義的概念去包裝職場那些心機泛濫的scenario。首先,大家有沒有發現,那些腦細真的是生在香港地,活在國際思維裏?即係點?

場景一

開會時話要「腦震盪」(brainstorm),聽完下屬sell橋後,自己冷笑,然後將那些從領袖訓練營、CEO講座、乜乜市場管理課程學到的那一套,原裝「出口」,隻字不漏。還說:人家外國一早都在做乜乜物物,為何我們不可以前瞻一點,當香港特區的帶頭者?

又係喎,點解身為下屬的我諗不到?可能我的腦不細,一早已衝出地球。我想移民火星,因地球已不適合人類居住。

場景二

下屬度好橋後,腦細又冷笑,「大家要think big啦,今時今日不可以打工思維去做,要think outside the box,You Know?」知呀,我真係知呀﹗你困住大家係殮房咁凍嘅會議室裏面,你知唔知熱脹冷縮個原理?我個腦萎縮緊,如何think big啊?仲有,講咁多英文用詞不代表你有國際思維okay?只代表你語言能力有問題,不能用母語完整表達自己。

場景三

講到天花龍鳳,但最後個計劃有沒有預算去實行?人所共知金錢是萬能的惡,可以秒殺我哋一星期以來腦力大爆炸度出來的橋,呢個時候腦細又發揮其國際水平的管理能力:「創意從來不需要金錢,至於你提到execute的過程中那些花費當然是要的……但講緊我們是international brand,理應有power可以convince到很多單位跟我們友好合作。」對的!世上一定有免費午餐,而且又好食、又有營養。只是我笨,我無能,我不善於交際應酬,以致冇friend底,冇人肯幫我間公司免費或賤價工作。我是井底之蛙,我沒有國際視野,腦細真知灼見,目光如炬,一眼已睇穿金錢不是萬能這道理。親愛的腦細,五百蚊幫你拍太空片這樣的友好單位是存在於這個世界上的,你可以將死線延長至我們搵到佢唯止。等我好消息!

P.S.結尾送上充滿希望的勵志歌。
20160524

發表迴響

你的電子郵件位址並不會被公開。

文字無價 知己難求!

如果您喜歡CommaTravel的文章,只要按個讚支持,謝謝 🙂